БИШКЕК, 9-дек. — Sputnik. Баткен облустук сотунун кылмыш-жаза иши жана жоруктар боюнча соттук коллегиясы буга чейин өмүр бою эркинен ажыратылган Тажикстандын А.К. жана А.Ю аттуу эки жаранын 20 жылга кести. Бул тууралуу соттун сайтына жарыяланды.
Эске салсак, Баткендин Лейлек райондук соту Кыргызстан менен Тажикстандын чек арасында апрель-май айларында болгон кагылышуудагы талап-тоноочулук боюнча жогоруда аталган жарандарга карата өкүм чыгарган. Анда алар "Тынчтыкка каршы кылмыштар" (380-берене) боюнча күнөөлүү деп табылып, жазалары бириктирилип, жалпы 280 миң сом айып салынуу менен өмүр бою эркинен ажыратылган. Алардын бири жергиликтүү тургунга материалдык зыян келтиргени үчүн сегиз миллиондон ашуун каражат төлөмөй болгон.
Бирок айыпкерлердин адвокаттары мындай чечимге макул эместигин билдирип, Баткен облустук сотуна кайрылган. Апелляциялык даттануулардын негизинде кылмыш иши кайра каралды.
А.Ю. аттуу жарандын адвокаты анын жашы жете элек балдары карыган ата-энесинин колунда калганын жана ден соолугундагы көйгөйлөрүн, ошондой эле буга чейин соттолбогонун эске алып "Морадерлук" беренеси боюнча күнөөлүү деп табууну суранган.
Ал эми А.К. аттуу жарандын жактоочусу райондук соттун чечимин жокко чыгарууну өтүнгөн.
Натыйжада, Баткен облустук соту материалдарды карап чыгып, эки жаранды тең күнөөлүү деп тапты. Алар Кылмыш-жаза кодексинин (2021-жылдагы редакциясы — ред.) 402 ("Тынчтыкка каршы кылмыштар") жана 412-беренелери ("Морадерлук") боюнча күнөөлүү деп табылып, ар бири 20 жылдан эркинен ажыратылды.
Кыргыз-тажик чек арасында 28-апрелден 1-майга чейинки куралдуу кагылышууда Тажикстан менен чектеш Максат айылынын тургундарынын үйлөрү, унаалары талкаланып, өрттөлүп, тонолгон. Анда кыргызстандык 36 адам каза болуп, 100дөн ашуун адам жаракат алган.