БИШКЕК, 5-дек. — Sputnik. Кара-Кечеден Бишкекке көмүр вагон менен ташылып келе баштады. Бул тууралуу "Кыргыз көмүр" ишканасынын маалымат катчысы Жийде Зоотбекова Facebook баракчасы аркылуу билдирди.
Анын айтымында, вагон менен алып келинген көмүрлөр 3000 сомдон сатылат.
"Кара-Кеченин 3000 сомдук көмүрү вагон менен келди. Жалпы 1 200 тонна Мурманский көчөсүндө жайгашкан кампага түшүрүлдү", — деп жазган ал.
Эске салсак, буга чейин президент Садыр Жапаров Кара-Кече көмүрү 3 000 сомдон сатыларын убадалап, көмүр ушул баа менен бериле баштаган. Бирок арзан көмүр аз-аздан келип, кезекке тургандар көбөйгөн. Сатуучулар арзан көмүр алууну каалагандар 10 күн эрте кезекке туруп, тизмеге жазылышы керектигин эскертишкен.
Монополияга каршы жөнгө салуу мамлекеттик агенттиги жеке ишкерлер алып келген көмүрлөрдүн эленгени 5 700 сомдон, эленбегени 4 500 сомдон сатылып жатканын билдирген.