БИШКЕК, 4-дек. — Sputnik. Пандемияга карап көпчүлүк үй-бүлө балалуу болуу пландарын жылдырып коюп жатат, бирок бул туура эмес. Мындай пикирин РИА Новости агенттигине Жордж Мейсон университетинин (АКШ) профессору, биология илимдеринин доктору, Россиянын Илимдер академиясынын мүчөсү Анна Баранова айтты.
"Балалуу болуш үчүн пандемия бүтсүн деп күтүүнүн кереги жок. Биринчиден, ал качан бүтөрү белгисиз. Экинчиден, болочок ата-эненин ден соолугу коронавирустан кийин 100 пайыз мурдагыдай калыбына качан келерин эч ким айта албайт. Ал эми кош бойлуу учурда вирус жугузуп алам деп корккон аялдарга боюна бүтөрү менен декретке чыгып кетүүгө же үйдө иштөөгө шарттар түзүлсө жакшы болмок", — деди Баранова.
Ошондой эле адис пандемиянын соңун күтүп жатып, айрым аялдардын жашы өтүп кетиши мүмкүн экенин эскертти.
"Организмдин улгайышы менен энелик клеткалар түгөнө баштайт. Андыктан убакыт өткөн сайын табигый жол менен бойго бүтүрүү мүмкүнчүлүгү азаят", — деди адис.
Мындан тышкары, ал жасалма жол менен кош бойлуу болгусу келип жүргөндөрдү бул планын кийинкиге жылдырбай эле коюуга чакырды. Анткени убакыт өтүп кетип, аял эне болуу мүмкүнчүлүгүнөн өмүр бою ажырап калышы мүмкүн.