БИШКЕК, 3-дек. — Sputnik. Кийинки жылы Кара-Балтада текстиль фабрикасын ачуу пландалууда. Бул тууралуу Инвестициялар агенттиги билдирди.
Аны Кара-Балта килем комбинатынын базасында ишке киргизүү каралган, имараттын жалпы аянты 53 миң чарчы метрди түзөт.
Аталган долбоор 25 миллион долларга бааланууда, аны жүзөгө ашырууга түркиялык инвесторлор каражат берет. Агенттик билдиргендей, учурда фабриканын курулушуна 400 миң доллар бөлүндү.
"Ишкананын уникалдуулугу ар тармактуу экенинде. Мында калдыктар чыгарылбайт. Текстилдик калдыктардан кайра иштетүү жолу менен жип чыгарып, ал жиптен материал токулат", — деп жазылган маалыматта.
Фабрика толук иштеп баштагандан кийин 800-1000 адамга жумуш оруну түзүлөрү айтылды.