БИШКЕК, 1-дек. — Sputnik. Милиция “Ата Мекен” партиясынын лидери Өмүрбек Текебаевге кол салган жарандарды издеп жатат. Бул тууралуу Бишкек шаардык милициясынан кабарлады.
“Аталган факты Кылмыштардын бирдиктүү реестрине Жазык кодексинин 201-беренесине (“Адамдардын тобу же алдын ала сүйлөшүү боюнча адамдардын тобу тарабынан тоноо”) ылайык катталды. Ден соолукка келтирилген залалды аныктоо үчүн соттук-медициналык экспертиза дайындалды”, — деп айтылат билдирүүдө.
Учурда аталган кылмышты жасаган адамдар изделүүдө.
Белгилей кетсек, бүгүн борбор калаадагы мейманканалардын биринин алдында Өмүрбек Текебаевге белгисиз балдар кол салган. Президент Садыр Жапаров Текебаевге кол салуу ишин тез арада териштирүү боюнча ИИМге тапшырма берген.