БИШКЕК, 30-ноя. — Sputnik. Кыргызстандык режиссёр Айкөл Нурланбек улуунун "Мээрман" кыска метраждуу даректүү тасмасы Стамбулда өткөн "Ааламдарга ырайым" эл аралык кинофестивалында баш байге утту. Маалыматты Sputnik Кыргызстанга режиссёр тастыктады.
Аталган сынакка 65 өлкөдөн 568 кыска метраждуу тасма катышкан. Анын ичинен Нурланбек уулунун эмгеги "Эң мыкты даректүү тасма" сыйлыгына татыган.
"Канн кинофестивалында сыйланган франциялык режиссёр, сценарист жана актёр Оливер Лакс менен сүйлөшкөндө "Мээрман" фильмине "мен көргөн мыкты даректүү тасма" деген баасын берди. Ал бул фестивалда калыстар тобунун төрагасы болгон. Тасманы жаратууга салым кошкон чыгармачылык топко ыраазычылыгымды билдирем", — деди Нурланбек уулу.
"Ааламдарга ырайым" — абройлуу эл аралык кинофестивалдардын бири. Быйыл 22-27-ноябрь күндөрү Түркиянын Стамбул шаарында жетинчи ирет өткөрүлдү.
Белгилей кетсек, Айкөл Нурланбек уулунун "Мээрман" киносу буга чейин "Түрк дүйнөсүнүн даректүү тасмалары" фестивалында үчүнчү орунга татыган.
Андан мурда Бишкекте өткөн “Кыргызстан — кыска метраждуу тасмалар өлкөсү” фестивалында "Көрүүчүлөрдүн сүймөнчүлүгү” сыйлыгына ээ болгон. "Үмүт" КМШ өлкөлөрүнүн жаш киночулары форумунун улуттук сынагында "Мыкты тасма" аталган.