БИШКЕК, 29-ноя. — Sputnik. Мамлекет башчы Садыр Жапаров "добуштар уурдалды" деген партияларга Facebook баракчасы аркылуу кайрылуу жасады.
"Борбордук шайлоо комиссиясынын серверинде "сбой" болду, "добуштарды уурдады" деп ызы-чуу салып жаткан партиялар, бюллетендерди кол менен санап чыгууга силерге эч ким тоскоол болбойт. Кол менен санап чыккыла. Ар бир нааразы болгон партиялар ынанмайынча бюллетендер эч жакка жылбашы керек. Эгер чындап эле БШК шайлоо жыйынтыгын бурмалаган болсо, анын бардык мүчөлөрү жоопко тартылат, керт баштары менен жооп берет. Бийлик шайлоо процессине кийлигишпегендей эле БШКнын ишине киришкен жок. Кийлигишкендер болсо, БШКнын мүчөлөрү, ачык айткыла. Адамдан коркпогула, кудайдан корккула", — деп жазган президент.
Белгилей кетсек, бүгүн БШКнын сайты эки жолу иштебей калган. Биринчисинде, партиялардын алган добуштарын пайыздык көрсөткүч менен эсептей келгенде 100 эмес, 140 пайызга чыгып кеткен. Ошондой эле АСУдан түшкөн добуштарды көрсөтүп жаткан сайт маалымат бербей жабылып калган.