БИШКЕК, 27-ноя. — Sputnik. Президент Садыр Жапаров бүгүн, 27-ноябрда, КМШнын байкоочулар миссиясынын курамына кирген аткаруу комитетинин төрагасы — аткаруучу катчысы Сергей Лебедев менен жолукту. Бул тууралуу өлкө башчынын маалымат кызматы билдирди.
Жапаров Кыргызстанга парламенттик шайлоону даярдоого жана өткөрүүгө мониторинг жүргүзүү үчүн КМШнын атынан келген байкоочулар миссиясынын өкүлчүлүгүнө ыраазычылык билдирген. Ал ошондой эле үстүбүздөгү жылы КМШнын түзүлгөнүнө 30 жыл толгонун эске салып, Кыргызстан биргелешип иш алып барууну жана шериктештикти мындан ары да бекемдеп, анын эл аралык аренадагы позициясын чыңдоого жана динамикалык өнүгүүсүнө багытталган умтулуусун толук колдой турганын белгиледи.
"Кыргызстан тышкы саясатты ырааттуу жүргүзүп, өзүнүн эл аралык милдеттерин абийирдүүлүк менен аткарып, анын ичинде ачык-айкын жана демократиялуу шайлоону өткөрүү, ошондой эле жарандардын өз эркин билдирүүсүн камсыздоону жактайт", — деди президент.
Жапаров Кыргызстан шайлоо процессин демократиялык принциптердин негизинде улуттук мыйзамдарга жана өлкөнүн эл аралык милдеттенмелерине ылайык өткөрүү үчүн бардык күч-аракетин жумшап жатканын кошумчалады.
"Бизде күчтүү саясий эрк бар. Аны менен биз Кыргызстанда бул шайлоону ачык-айкын жана жогорку деңгээлде өткөрүү үчүн бардык шарттарды түзүүгө аракет кылдык", — деди ал.
Президент республиканын бардык аймактарында байкоочулардын иш алып барып жатканы өлкөнүн ачык-айкын, демократиялуу шайлоолорду өткөрүүгө умтулуусун көрсөтүп турганын белгиледи.
Ал эми Сергей Лебедев алдыдагы шайлоону уюштуруу ишин жогору баалады.
"Биз Кыргызстандагы парламенттик шайлоону өткөрүүгө өзгөчө маани беребиз жана шайлоодон кийин өлкөнүн ырааттуу өнүгүшүнө чын жүрөктөн ишенерибизди билдиребиз", — деди ал.
Лебедев 28-ноябрдагы шайлоо тынч жана татыктуу өтүп, эл аралык байкоочулар тарабынан да таанылып, Кыргызстан элинин кызыкчылыгын чагылдырат деген ишенимин билдирди.