БИШКЕК, 23-ноя. — Sputnik. Тажикстандын "Фахробод" аскердик полигонунда "Кобальт-2021" аталышындагы атайын тактикалык аскердик машыгуу өттү. Иш-чарага ЖККУнун ыкчам аракеттенүү күчтөрү жана Ички иштер министрлигинин атайын даярдыктагы аскер бөлүгү катышканын ИИМдин маалымат кызматы билдирди.
Аскердик машыгууга катышкан Кыргызстандын ички иштер министринин орун басары Октябрь Урмамбетов сөз сүйлөп, иш-чара жогорку деңгээлде өткөнүн белгиледи.
Тартылган бардык жоокерлер жана атайын багыттагы күчтөрдүн ыкчам штабы биргелешкен жана жогорку кесипкөйлүк жөндөмдөрүн көрсөтүшүп, бул машыгуулардын ийгиликтүү жыйынтыгынын ачкычы болуп калды.
"Учурда трансулуттук кылмыштуулук, экстремизм жана баңгизатка байланыштуу кылмыштар эл аралык масштабда жайылып, дүйнө тынчтыгына, коопсуздугу менен бейпилдигине коркунуч туудурган бүгүнкү заманда атайын машыгуулар жана Жамааттык күчтөрдүн биргелешкен аракеттеринин практикалык тажрыйбасы өзгөчө маанилүү. Өткөрүлүп жаткан машыгуулар кылмыштуулук менен күрөшүүгө чоң салым кошуп, мамлекеттерибизде туруктуулукту жана тынчтыкты сактоого кызмат кылат деп ишенем", — деген министрдин орун басары.
Сөзүнүн соңунда Урмамбетов кезектеги "Кобальт-2022" машыгууларын Кыргызстанда өткөрүү пландалып жатканын билдирип, аны уюштурууда ар тараптуу колдоо жана жемиштүү кызматташуулар болоруна үмүт артарын белгиледи.