БИШКЕК, 22-ноя. — Sputnik. UFC уюмунун чемпиону Валентина Шевченко Бишкектеги соода борборлордун биринде күйөрмандары менен жолугуп жатат.
Мушкер менен жолугушууга жүздөгөн киши келген.
"Үйүмө келгениме кубанычтамын. Кыргызстан менин мекеним, күч топтогон жерим. Эки жыл мурун алган дем менен наамымды алты ирет коргодум. Дагы ошончо күч алып кетем деп ойлойм. Келгениңиздерге ыраазычылык. Кыргызстан, алга!" — деди Шевченко.
Ошондой эле мушкерге күйөрмандарынын бири чапан кийгизип, жоолук салат.
Шевченко Бишкекке кечээ, 21-ноябрдын таңында, учуп келген. Ал мекенинде үч-төрт апта болорун, Ысык-Көлгө барууну пландаганын айтты.
Валентина Кыргызстанга акыркы жолу 2019-жылы 7-апрелде келип, 8-9-апрель күндөрү Бишкекте жана Ошто күйөрмандары менен жолугуп, президент Сооронбай Жээнбековдун колунан "Даңк" ордени менен сыйланган. Ошондой эле бир жумалык эс алуусунда бир топ жерге барганга жетишкен.