Жаштарга мыйзамдарды комикстер аркылуу түшүндүрүү колго алынууда. Бул тууралуу Артур Бакиров Sputnik Кыргызстан радиосунда маек куруп жатып билдирди.
Анын айтымында, мыйзамдар юридикалык татаал тил менен жазылгандыктан көптөр түшүнбөйт.
"Коомчулукта мыйзамдардын иштебей жатканы айтылып келет. Мунун себеби көп. Алардын бири — мыйзамдар юридикалык татаал тил менен жазылат. Натыйжада карапайым калкка түшүнүксүз болуп калууда. Ошондуктан ушул жылдын май айынан бери аларды калкка жеткиликтүү кылуу боюнча атайын долбоор иштеп жатат. Анын алкагында 60ка чукул юрист сынак аркылуу кабыл алынып, мыйзамдарды жазуу процесси үйрөтүлдү. Андан тышкары, учурдагы мыйзамдарды талдоого алып, кемчиликтерди жоюп, жакшыртууга салым кошушууда. Долбоордун өзгөчөлүгү мыйзамдарды жөнөкөй тил менен түшүндүрүү. Ал үчүн социалдык тармактардан жаштарга комикстер аркылуу мыйзамдарды жеткирүү аракети көрүлдү. Натыйжада жаштар, жарандар өз пикирлерин жаза баштады. Учурда кабыл алынып жаткан мыйзамдарды жөнөкөй кылып жеткирүүгө мамлекеттик органдардын мүмкүнчүлүктөрү жетпейт", — деди Бакиров.
Юрист мыйзам жазууда элдин көпчүлүгүнүн пикири эске алынбаса, анын иштеп кетишине кепилдик жок экенин кошумчалады.