БИШКЕК, 16-ноя. — Sputnik. Бишкектеги айрым май куюучу бекеттерде дизель жок болуп жатат. Бул тууралуу Sputnik Кыргызстан редакциясына окурман кабарлады.
Ал эми Кыргызстандын Нефтетрейдерлер ассоциациясынын президенти Канат Эшатов мындай көйгөй бир гана Бишкекте эмес, жалпы Кыргызстанда болуп жатканын билдирди.
"Ооба, айрым май куюучу жайларда күйүүчү майдын бул түрү жок. Анткени тартыштык жаралууда. Мисалы, мурда айрым бекеттерге эки автоунаа менен дизель майы жеткирилсе, азыр бирден гана жиберилип жатат. Ошондуктан түшкө жетпей эле түгөнүп калып, кийинки автоунаа май жеткиргиче убакыт өтүп кетүүдө", — деди Эшатов.
Тартыштыктын себеби Россияда дизель майынын аз болуп жатышы экени айтылды.
"Албетте, мындай учурда суроо-талап күч алып, баалар көтөрүлүп кетти. Анткен менен товар жетиштүү көлөмдө жок болуп, аз-аздан гана сатылып жатат", — деди ассоциациянын президенти.
Сөзүнүн аягында ал мындан улам чакан компаниялар жабыла баштаганын айтты. Себеби өзүнүн май куюучу жайларын камсыздоого аракет кылган ири нефтетрейдер аларга дизелди сатпай калды.