БИШКЕК, 13-ноя. — Sputnik. Кыргызстанда январдан сентябрга чейин жол кырсыгынан 600гө чукул адам көз жумду. Бул тууралуу ИИМдин маалымат кызматы кабарлады.
Ички иштер министрлиги 2021-жылдын тогуз ай ичинде аткарган ыкчам-кызматтык ишмердүүлүгүнүн жыйынтыгын чыгарды. Ага ички иштер министри Улан Ниязбеков, анын орун басарлары, башкармалыктардын, ошондой эле айрым шаардык жана райондук бөлүмдөрдүн жетекчилери катышкан.
"Жол коопсуздугун сактоо боюнча жүргүзүлгөн иш-чараларга карабастан жол кырсыктары өстү. Жалпысынан тогуз айда 5 437 жол кырсыгы катталып, андан 587 адам каза болгон. Ал эми 8 298 жаран ар кандай жаракаттарды алган", — деп жазылган билдирмеде.
Министр Улан Ниязбеков Жол кыймылынын коопсуздугун камсыздоо башкы башкармалыгына кырсыктарды алдын алуу үчүн он күндүн ичинде комплекстүү иш-чаралардын планын иштеп чыгып, министрлер кабинетине сунуштоону тапшырган.
ЖКККББга жарандардын өмүрүн сактоого багытталган иш-чараларды күчөтүү керектигин да айткан.