БИШКЕК, 10-ноя. — Sputnik. Кыргызстан бюджеттин тартыштыгына байланыштуу Эл аралык түрк академиясына мүчөлүк акынын төлөмүн 10 эсе кыскартты. Аталган келишимди ратификациялоо боюнча мыйзам долбоорун Жогорку Кеңеш үч окуудан жактырды.
Жыйында билим берүү жана илим министринин орун басары Надира Жусупбекова баяндама жасап, Кыргызстан буга чейин академиянын жылдык бюджетинин беш пайызын төлөп келсе, эми ал 0,5 пайызга түшүрүлөрүн айтты. Буга мүчө мамлекеттердин баары макулдук берген.
“Пандемиядан улам республикалык бюджеттин тартышты жаралганда ушундай кадамга барганбыз. Бул макулдашуу 2020-жылдын 28-ноябрында Стамбул шаарында кол коюлган "Түрк академиясынын бюджетине мүчө мамлекеттердин милдеттүү төгүмдөрүнүн өлчөмү боюнча протоколдо" бекитилген. Анда Кыргызстандын милдеттүү төгө турган акчасы 0,5 пайыз өлчөмүндө белгиленген”, — деди Жусупбекова.
Белгилей кетсек, Эл аралык түрк академиясы жалпы түрк тилдүү элдердин руханий мурастарын, баалуулуктарын, көркөм дөөлөттөрүн изилдөө жана жайылтуу багытында иш алып барат. Ага Кыргызстан, Казакстан, Азербайжан, Түркия мамлекеттери мүчө.