БИШКЕК, 9-ноя. — Sputnik. Биринчи май райондук соту бир жаран менен кайгуул милициясынын эки кызматкерин мыкаачылык менен сабады делип соттолгондордун бир тууганын актады.
2020-жылдын август айында кылмышкердин бири Жаныбек Бапышев 10 жылга, шериги Калысбек Сейитбеков 11 жылга эркинен ажыратылган.
Окуянын чоо-жайы
2019-жылы 28-августта болжол менен саат 7:00дөр чамасында Бишкек ШИИБге Жал кичи районундагы супермаркеттин жанында кишилердин мушташып жатканы кабарланган. Жерине милициянын кайгуул күзөт кызматы барган. Мындан сырткары, Чүй ОИИББдин кызматкери Казыбек Бапышев дагы келип (кийин ал шектүүнүн бир тууганы болуп чыккан), эки шектүүнү алып кеткен. Эки жабырлануучу оор абалда ооруканага жеткирилген. Кийин шектүүлөр милицияга өздөрү келген.
Ал эми милициядагы тууганы Казыбек Бапышев кызматтан бошотулган. Кийинчерээк аны УКМК кылмышты жашырууга айыптап кармаган. Башында ал тергөө абагына киргизилип, кийин баш коргоо чарасы өзгөртүлүп үй камагына чыккан.
Соттун чечими
Бишкектеги райондук сот Казыбек Бапышев жана С. Э. менен К. М. аттуу кайгуулчулар боюнча чечим кабыл алды. Алардын аракетине юридикалык баа берип жатып, сот Бапышев милициянын ишине тоскоолдук кылган эмес жана туугандарынын пайдасына чечим кабыл алууга мажбурлаган эмес деген чечим чыгарды.
Сотто тергөө С. Э. менен К. М. аттуу милиционерлерди тастыкталбаган фактыларга таянып айыптаганы айтылды. Тагыраагы, милиционерлер мушташтын Б. Ж. менен С. К. аттуу катышуучуларын милиция бөлүмүнө алып келбей койгону айтылган.
Соттук териштирүүлөр маалында Б. Ж. менен С. К. кайгуул милициясы тарабынан Ленин райондук милициясынын шаардык бөлүмүнө алып келингендиги аныкталган. Жыйынтыгында сот Бапышев менен аталган милиционерлерди күнөөсүз деп тапты.