Маалыматка караганда, 2021-жылдын 19-сентябрынан тарта 12-ноябрга чейин ар бир жаран өзүн шайлоочулардын тизмесинен тактап, табылбаган учурда коштура алат.
“Бул үчүн чет өлкөлөрдө жашап же учурда жүргөндөр ал мамлекеттеги Кыргызстандын элчилигине же өкүлчүлүгүнө кайрылса болот. Добушту дагы элчиликтин имаратынан беришет”, — деп айтылат түшүндүрмөдө.
Ошондой эле добуш берүүгө катышам деген ар бир жаран биометрикалык маалыматтарды тапшыруусу керек. Тапшыра элек болсо, жүргөн өлкөсүндөгү элчиликтерге алдын ала барышы зарыл.
Ал эми башка мамлекетте жашап жүрүп, бирок шайлоо учурунда Кыргызстандан келген мекендештер консулдук каттоодон чыгып, каттоо органдарына барып, кайрадан өзүн Кыргызстандагы шайлоочулардын тизмесине коштуруусу зарыл.
Эске салсак, 28-ноябрь күнү Кыргызстанда парламенттик шайлоо болот.