БИШКЕК, 7-ноя. — Sputnik. Тарых жана ата-бабаларды эскерүү күнүндө мамлекеттик катчы Сүйүнбек Касмамбетов жана саясий коомдук ишмерлер бүгүн "Ата-Бейит" улуттук тарыхый-мемориалдык комплексине барды. Бул тууралуу президенттин маалымат кызматынан кабарлады.
Мамлекеттик катчы Касмамбетовдон сырткары ал жерде маданият, маалымат, спорт жана жаштар саясаты министри Азамат Жаманкулов, президенттин Чүй облусундагы ыйгарым укуктуу өкүлү Эркин Тентимишев, белгилүү саясий ишмерлер – аксакалдар Апас Жумагулов, Медеткан Шеримкулов жана башка инсандар болгон.
Баргандар 1916-жылдагы трагедиялуу окуялардын, саясий репрессиянын курмандыктарына арналган эстелик мемориалдарына жана жазуучу Чыңгыз Айтматовдун бейитине гүл коюп, куран окушкан.
Бул эскерүү күнгө карата президент Садыр Жапаров да калкка кайрылуу жасаган.