Тилекке каршы, айыл чарбасынын ички дүң өндүрүмдөгү үлүшү 15 пайызды гана түзөт. Андыктан тармакты илгерилетүү негизги максат. Бул тууралуу Аскарбек Жаныбеков Sputnik Кыргызстан радиосунда маек куруп жатып билдирди.
Анын айтымында, өлкөнүн 2026-жылга чейинки улуттук өнүктүрүү программасында айыл чарба тармагын өнүктүрүүгө олуттуу көңүл бөлүнгөн.
"Айыл чарбасын көтөрүүдөгү биринчи багыт — кластердик өнүгүү. Тактап айтканда, эт, сүт, канаттуулар продукциясын, май өсүмдүктөрүн өндүрүүдө, багбанчылыкта жана башка тогуз чоң мамлекеттик деңгээлдеги кластерди түзүү. Аны аймактык, райондук деңгээлдеги багыттары менен түзүү мерчемделүүдө. Кластер — киреше табуу максатында айыл чарба өндүрүшчүлөрүнүн өз ыктыяры менен биригүүсү. Ошондой эле финансы, илимий институттардын, жергиликтүү өз алдынча башкаруу органдарынын чогуу иштеши. Мына ушуну айыл чарбасына киргизүү, өздөштүрүү ыкмалары иштелип чыкты. Экинчиси, республикалык бюджеттен, донорлордон жана инвестициялардан айыл чарба өндүрүшүнө жеңилдетилген каржы булактарын ачып берүү. Пандемия көптөгөн татаалдыктарды жаратып, бул багыттагы көйгөйлөрдү көрсөттү. Ошондуктан учурда Айыл чарба министрлигинин алдындагы эң негизги милдет — азык-түлүк коопсуздугун камсыздоо. Анткени ал мамлекеттик коопсуздукту камсыздоонун бир бөлүгү. Буудай, сүт азыктары, эт азыктары, жумуртка, жашылча, багбанчылык продукциялары, өсүмдүк майы жана шекер менен өзүбүздү 80-85 пайызга камсыз кылышыбыз керек. Учурда өсүмдүк майы менен 20, калганы 50-60 пайыздык деңгээлде өзүбүздү камсыздайбыз. Андан сырткары, үч көрсөткүч боюнча экспортко чыгып жатабыз", — деди Жаныбеков.
Ошондой эле ал кайра иштетүүгө жана органикалык айыл чарбаны өнүктүрүүгө дагы басым жасала турганын кошумчалады.
Подкастты толугу менен видеодон көрө аласыз: