БИШКЕК, 2-ноя. — Sputnik. Кыргызстандын эмдөө боюнча күбөлүктөрү Россияда таанылбагандыктан Москвада жумушка орношууда мекендештер башынан өткөргөн кыйынчылыктар боюнча элчилик маалымат таратканын ТИМ билдирди.
Анда 2021-жылдын 10-июнунан тартып Тышкы иштер, тышкы соода жана инвестициялар министрлиги Кыргызстандын эмдөө сертификаттарын чет мамлекеттер тарабынан таануу боюнча иштерди жүргүзүп жатканы айтылган.
"Эмдөө жөнүндө Кыргызстандын сертификаттарынын үлгүлөрү аларды Россиянын аймагында таануу жөнүндө өтүнүч менен дипломатиялык каналдар аркылуу Россиянын ыйгарым укуктуу органдарына жөнөтүлдү", — деп айтылган билдирүүдө.
Бул маселе Кыргызстандын РФтеги элчилиги тарабынан Россиянын Тышкы иштер министрлигинде өткөн жыйындарында көтөрүлүп жатканын да кабарлашкан.
Андан сырткары, аталган өлкөдө иштеп келүүгө камынгандардын тастыкталган россиялык препараттарды алуусу максатка ылайыктуу экендигин эскерткен.
"Россия жактын маалыматы боюнча, кыргыз тараптын кайрылуусу учурда тиешелүү компетенттүү органдарда каралып, КРдин эмдөө боюнча сертификаттарын таануу процедурасы аягына чыга элек. Белгилей кетсек, бүгүнкү күнгө чейин Россияда чет элдик сертификаттардын бири дагы тааныла элек. Жогоруда айтылгандарды эске алуу менен Россияда жумушка орношууда жана QR-коддорун алууда кыйынчылыктарды болтурбоо максатында элчилик Россияга иштөөгө келүүнү көздөгөн мекендештер үчүн бара турган өлкөсүндө тастыкталган россиялык препараттарды алуусу максатка ылайык деп эсептейт", — деп билдиришти элчиликтен.
Кыргызстандын эмдөө сертификаттарын чет мамлекеттерде таануу боюнча иштер КРдин Тышкы иштер, тышкы соода жана инвестициялар министрлиги, ошондой эле Саламаттык сактоо министрлигинин багыты боюнча улантылары айтылды.