БИШКЕК, 1-ноя. — Sputnik. Ильич Марсбек уулу айыл, суу чарба жана аймактарды өнүктүрүү министринин орун басарлыгынан бошотулганын министрлер кабинетинин маалымат кызматынан кабарлады.
Аткаминерди иштен алуу боюнча токтомго министрлер кабинетинин жетекчиси Акылбек Жапаров кол койгон. Аталган чечим "Мамлекеттик жарандык жана муниципалдык кызмат жөнүндө" мыйзамдын "ишенимди жоготту" деген негиздемеси менен кабыл алынганы айтылды.
Бир нече күн мурда УКМК Айыл, суу чарба жана регионду өнүктүрүү министринин М.И. (Ильич Марсбек уулу) аттуу азыркы жана И.А.С. (Амангелди Исаев) аттуу мурдагы орун басарын кармаган.
Анда айыл чарба азыктарын сыртка экспорттоодо бир нече жыл бою атайылап тоскоолдуктарды жаратып, өз ара сүйлөшүп алган кызмат адамдарынын жана жеке компаниялардын туруктуу тобу аныкталган. Алардын мындай жол менен материалдык пайда көргөнү айтылган.