БИШКЕК, 31-окт. — Sputnik. Россия президенти Владимир Путин G-20 уюмунун саммитинде сүйлөп жатып коронавируска каршы вакцина иштеп чыккан мамлекеттерди тез арада бири-биринин препаратын таанып, бирге иштешүүгө чакырды. Бул тууралуу "Известия" басылмасы жазды.
Россия лидеринин айтымында, ушул тапта муктаж өлкөлөр дагы деле вакцинаны жетиштүү көлөмдө ала албай жатат. Мунун кесепетинен вируска каршы күрөшүү анчалык эффективдүүлүгүн көрсөтө элек.
"Буга мамлекеттердин бири-бири менен болгон абийирсиз атаандашуусу себеп болууда. Ушул эле G-20 уюмуна кирген өлкөлөрдү бири-биринин вакцинасын таанып, кабыл алууга чакырат элек. Бул нерсе вирустун мизин тезирээк кайтарып, туризмди өнүктүрүүгө жардм бермек", — деди Путин.
Көп өтпөй Дүйнөлүк саламаттык сактоо уюмунун башчысы Тедрос Адханом Гебрейесус бул сунушу үчүн Владимир Путинге ыраазычылык билдирди.
Буга чейин Гебрейесус пандемияны токтотуу үчүн ири компаниялар өзү иштеп чыккан вакцинаны интеллектуалдык менчиги катары эсептегенди токтотуп, аны өндүрүүгө көпчүлүккө мүмкүнчүлүк берүү керектигин айткан.