БИШКЕК, 29-окт. — Sputnik. Бүгүн, 29-октябрда, аскердик жана аскердик-техникалык кызматташтыктын алкагында Россия Кыргызстандын Куралдуу күчтөрүнүн аскердик клиникасы үчүн медициналык жабдуулар менен оргтехника берди. Бул тууралуу өлкөнүн Коргоо министрлигинин маалымат кызматы билдирди.
Колдоо Россиянын коргоо министри Сергей Шойгунун чечими менен ишке ашууда.
"Физиотерапиялык жана кошумча медициналык жабдуулар берилди. Эми Кыргызстандын Куралдуу күчтөрүнүн аскер кызматкерлерине жана ардагерлерине медициналык тез жана сапаттуу жардам көрсөтүүгө өбөлгө түзүлөт", — деп айтылат билдирүүдө.
Иш-чарага коргоо министри Бактыбек Бекболотов, Республикалык ардагерлер кеңешинин төрагасы Мырзакан Субанов жана Россиянын Кыргызстандагы элчилигинин коргоо иштери боюнча аскердик атташеси Игорь Довбня катышты.