Коомдук транспорттун ичинде болжол менен 20дай адам болгон. 55 жаштагы айдоочу жеңил жараат алганы айтылды.
№8 каттамдагы автобус Чыңгыз Айтматов көчөсү менен баратып Киргизия-1 конушуна жакын жерде кырсыкка кабылган. Бишкектеги Травматология жана ортопедия илим-изилдөө борборуна 12 киши ар кандай жаракаты менен түшкөн. Алардын бири Зарема Зарипова кызын мектептен алып үйүнө баратканын айтты.
"Айдоочу акырын, жакшы эле айдап бараткандай болгон. Астындагы бурулуштан машина чыкты окшойт, автобус жолдон чыгып кетип даракты сүздү. Андан ары эмне болгонун билбейм. Ичиндегилердин баары кулап, чуру-чуу түшүп бири-бирибизди карап калдык. Мен кызымды кучактап жатып калдым. Кызымдын абалы жакшы деп айтышты азыр, буту отургучка кысылып калыптыр. Жолдошум үйгө алып кетти. Өзүм буттарымды кыймылдата албай жатам", — деди жабырлануучу.
Аталган оорукананын директору Сабырбек Жумабеков эки жабырлануучунун кабыргалары, буту сынып, мээси чайкалып жандандыруу бөлүмүнө түшкөнүн билдирди. Ал эми экөө Нейротравматология бөлүмүнө жаткырылган. Сегиз киши амбулатордук жардам алып үйүнө жөнөтүлгөн.
Милиция кырсыктын чоо-жайын териштирүүдө.