БИШКЕК, 25-окт. — Sputnik. Сейилбек Урустемов экономика жана коммерция министринин биринчи орун басары болуп дайындалды. Бул тууралуу аталган ведомство билдирди.
Тийиштүү буйрукка министрлер кабинетинин төрагасы Акылбек Жапаров кол койгон.
Өкмөт башчынын биринчи орун басары Арзыбек Кожошев Урустемовду министрликтин жалпы жамаатына тааныштырды.
"Урустемов өз ишин мыкты билген профессионал. Буга чейин Улуттук банкта жана Евразия экономикалык комиссиясынын департаментинде иштеген", — деди ал.
Министрдин жаңы орун басары Россиядагы Обнинск атомдук энергетика институтунда инженер-системотехник адистиги боюнча билим алган. Ал эми Американын Массачусетс штатындагы Вильямс колледжинен экономиканы өнүктүрүү боюнча магистратураны окуган.
Эске салсак, экономика министринин мурдагы орун басары Данияр Иманалиев башка ишке өткөндүгүнө байланыштуу кызматын тапшырган.