БИШКЕК, 24-окт. — Sputnik. "Бугу-Эне" коомдук фондунун директору Салтанат Сеитова Facebook тармагына жыл башында Таласта жарадар абалда табылган илбирстин сүрөтүн чыгарды.
Жаабарс башына тийген октон улам эки көзү көрбөй калган.
"Биз аны дарылап, сезип-туюу менен жашоого үйрөттүк, бул үчүн ага атайын жай курулду. Ак илбирс өзүн абдан жакшы сезип, ал тургай ойноп да калган. Сиз Жаабарстын тамак-ашына жардам берсеңиз болот. Ал күнүнө 3-4 килограмм эт (уй, жылкы, тоок, кемирүүчүлөрдүн эттерин) жейт. Витаминдер жана кан айлануу, көз үчүн (сокур экенине карабай) ар кандай дары-дармектер керек", — деп жазган ал.
Жаныбар депрессияга түшүп тамак жебей өлүп калбашы үчүн ага топ, оюнчуктар керектигин да кошумчалаган.
"Дайыма жанында болуп, абалын ушул калыбында сакташ керек. Учурда боулинг тобу абдан зарыл болуп турат. Ал оор болуп, машыгууга ылайыктуу экен. Бизге берилген эт, акчалай жардамдарга, курулуш материалдары, оюнчуктар, топпу, баарына ыраазы болобуз", — деп кошумчалаган фонддун башчысы.
Анын айтымында, эгер мурда бул сыяктуу жардамдар жалаң чет элдиктер тарабынан берилип келсе, Жаабарстын окуясынан кийин кыргызстандыктар да жапайы жаныбарларды коргоого көңүл бура баштады.
"Жаабарстын окуясы, балким, жүрөктөрдөгү жаныбарга болгон сезимдерди жибитти окшойт... Мекендештер жана ишканалар көйгөйгө көңүл бура баштады. Бул абдан жагымдуу көрүнүш", — деген Сеитова.
Жаабарстын тарыхы
Жырткычты Талас облусунан Бишкекке 10-январда алып келишкен. Анын башынан 18 даана чачма ок алынган. Рентгендин жардамы менен бардыгы болуп анын денесинен 70тей чачма ок табылган эле.
Жаныбарды борбор калаадан ветеринарлар кылдат текшерүүгө алышкан. Анда жырткычтын оң көзү мурдараак эле соолуп калганы анык болгон. Ал эми экинчи көзү адамдар кол салганда жабыркаган. Кийинчерээк жаныбарга операция жасалып, бир көзү дагы такыр көрбөй калганы белгилүү болгон.
Илбирстин көзүн калыбына келтирүү аракетинен майнап чыккан эмес.