БИШКЕК, 20-окт. — Sputnik. Министрлер кабинетинин төрагасынын орун басары Азиз Аалиев эмне үчүн казакстандык Hampton Resources Limited компаниясы Бишкек ТЭЦинин буу казандарын колдонорун айтып берди.
Министрлер кабинетинин төрагасынын орун басары Азиз Аалиев
© Фото / пресс-служба РКФР
Парламенттин жыйынында депутат Наталья Никитенко аталган компания Жаңы Зеландияда катталып, кеңсеси Лондондо жайгашканын билдирди. Ал компанияны укук коргоо органдары тыкыр текшериши керектигин айтууда. Депутат кырдаал көп кооптуулукка түртөрүн, тагыраак айтканда, стратегиялык объектинин (Бишкек ТЭЦ) буу казандарынын бир бөлүгү күмөндүү чет элдик компанияга өтүп кетет деп эсептеп жатат. Андыктан бул кырдаалда министрлер кабинети ишенимден кетерин билдирди.
"Ал компания Карагандадан байытылган көмүр ташыйт. Бизде жаңы буу казандар бар, алар Кара-Кече көмүрүнө ылайыкташкан. Ал эми эски 15 буу казан башында эле Караганда көмүрүнө ылайыкталып курулган. Hampton Resources Limited жөнөкөй эле эмес, байытылган көмүрдү ташып келет. Ал кошумча физикалык-химиялык жол менен күчтөндүрүлгөн, жылуулук чыгаруу коэффициенти толук көбөйтүлгөн. Мындай көмүр биздин буу казандардын эффективдүүлүгүн арттырат", — деди Аалиев.
Өкмөт башчынын орун басарынын айтымында, компания менен түзүлгөн келишимдин милдеттүү шарты Бишкек ТЭЦинде электр энергиясын иштеп чыгуунунун өздүк наркын 1,7 сомго, жылуулуктун бир гигакалорийин 900 сомдук деңгээлге түшүрүү болуп саналат. Учурда электр кубатын иштеп чыгуунун баасы кошумча нарк салыгын эсепке албаганда 3,4 сомду түзөт.
"Мындай көмүр таптуу келип, алда канча арзан түшөт. Азыраак көмүр жагылат. Муну менен шаарды каптаган ыш маселесин дагы чечүүгө салым кошобуз. Сиздер айтып жаткан кооптуулуктарды жоюу үчүн эффективдүү жумушчу модель түзүлөт. Биргеликте иштешүүнүн жыйынтыгында буу казандар компаниянын балансына өтпөй Бишкек ТЭЦинин өзүндө калат деп үмүт артабыз", — деди Аалиев.
Буга чейин Жогорку Кеңештин депутаты Наталья Никитенко Facebook тармагындагы баракчасына Кыргызстандын министрлер кабинети "Электр станциялары" ишканасын Бишкек ЖЭБине көмүр ташып келүү, буу казандарын жана башка жабдууларын карап иштетүү үчүн Hampton Resources Limited жеке компаниясы менен келишим түзүүгө милдеттендирди деп жазган. Кийин ага президенттик администрация түшүндүрмө берген.