БИШКЕК, 19-окт. — Sputnik. Бишкек санитардык полигонунда рекультивация иштери жанданды. Бул туурасында мэриянын маалымат кызматы билдирди.
Иштин жүрүшү шаардык муниципалитеттин жетекчилигинин көзөмөлүндө турганы белгиленди. Мэрия сентябрда эки жолу Европа реконструкция жана өнүктүрүү банкына кат жолдоп, эстониялык компания менен келишимди бузуу ниетин билдирген. Буга подрядчы компаниянын бир жарым жылга өлкөдөн кетиши, иштин токтоп калышы себеп болгон.
"Бир нече жолку сүйлөшүүдөн кийин подрядчы компания жакын арада ишти баштоо ниетин билдирди. Шаардын таштанды таштоочу жайындагы түтүндү жок кылуу иш-чараларынын планы түзүлүп, бекитилди. Ага эки ай убакыт берилди. Ишти мөөнөтүндө бүткөрбөй, шарттарын аткарбай коюу келишимди бузууга негиз болот", — деп айтылат маалыматта.
Полигон окуясы
2017-жылдын 10-июлунда мэрия таштанды полигонун жаап, андагы таштандыны рекультивациялоо үчүн эстониялык Ehitusfirma Rand Ja Tuulberg AS компаниясы менен келишим түзгөн. Келишимдин суммасы 1 миллион 596 миң 900 евро болчу. Буга каражатты Европа өнүктүрүү жана реконструкция банкы бөлгөн. Анын жарымы грант, калганы кредит катары берилет.
2021-жылдын 11-июнунда "Бишкек санитардык полигону" муниципалдык ишканасынын директору Адил Назаров Бишкек шаардык таштанды жайынын рекультивация иштери токтотулганын Sputnik агенттигине билдирген.
"Жаңы полигондун курулушуна 7,5 миллион евро, кийин дагы 1,5 миллион евро бөлүнмөк. Келишимге ылайык, биз эстониялык кесиптештерге таштандынын бардыгы рекультивация болгондон кийин каражатын төлөп беришибиз керек болчу. Бирок подрядчылар инфляция болуп күтүлбөгөн чыгымдар көбөйгөнүнө байланыштуу кошумча дагы 1 миллион 300 евро төлөп берүүнү суранышты", — деген Назаров.
Ал бул сумманы суроого негиз жок экенин айтып, маселе боюнча даттануу үчүн юристтер чакырылганын кошумчалаган.