БИШКЕК, 18-окт. — Sputnik. Бишкекте Баңгизатты мыйзамсыз жүгүртүүгө каршы күрөшүү кызматынын кызматкерлери жүк ташуучу унаадан 10 килограмм метамфетамин табышты. Бул тууралуу ИИМ кабарлады.
Ага ылайык, БТС бажы терминалынын аймагында Иран — Түркмөнстан — Өзбекстан — Казакстан — Кыргызстан каттамы боюнча жүргөн DAF үлгүсүндөгү жүк ташуучу унааны тинткен. Анда тыюу салынган заттардын сырты алмага окшотуп жасалганы айтылат.
"Министрликтин Криминалистикалык кызматынын алгачкы изилдөөсүндө ал зат метамфетамин (первитин) экени аныкталган. Көмүскө базарда 1 граммынын баасы 4 500 сом, ал өлчөмдөн 15 доза даярдоого болот. Алынган заттын салмагы 10 килограмм, дозасы 150 миң экени аныкталган. Баасы 450 миллион сомду (531 286 доллар) түзөт", — деп жазылган маалыматта.
Кармалган айдоочу Өзбекстандын жараны болуп чыкты. Аталган факт Жазык кодексинин 267-беренеси ("Баңгизаттарды, психотроптук каражаттарды жана алардын окшошторун сатуу максатында мыйзамсыз даярдоо") менен каттоого алынган.
Кармалган айдоочу Өзбекстандын жараны болуп чыкты
© Фото / пресс-служба МВД
Тергөөнүн алдын ала маалыматы боюнча, унаа Ирандан чыгып, Түркмөнстандан дагы бир чиркегич кошулган. Андан кийин Өзбекстанга жеткирилип, кайра чиркегич кошуп Кыргызстанга бет алган.
Тергөө уланууда.