БИШКЕК, 16-окт. — Sputnik. Таластын Кара-Ой айылында эки автоунаа кагышып, жол кырсыгы сегиз кишинин өмүрүн алды. Бул тууралуу ӨКМдин маалымат кызматы кабарлады.
Билдирмеге караганда, кырсык 15-октябрь күнү саат 22:54төр чамасында Суусамыр — Талас — Тараз унаа жолунун 61-чакырымында (Кара-Ой айылы) болгон.
"Анда Honda Stepwgn үлгүсүндөгү автоунаа менен DAF үлгүсүндөгү оор жүк ташуучу автоунаа кагышып, кырсыктан сегиз киши (жети эркек, бир аял) каза болгон", — деп айтылат маалыматта.
ӨКМ көз жумгандардын аты-жөнү учурда такталып жатканын кабарлады. Жерине ӨКМдин куткаруучулары тартылып, каза болгондордун сөөгү чыгарылып, ИИмге өткөрүп берилген.