БИШКЕК, 11-окт. — Sputnik. Карагандада (Казакстан) аттракциондон секирген аял жерге кулап набыт болду. Бул тууралуу Sputnik Казакстан жазды.
"Тарзанка" "Созвездие" мейманканасынын эң үстүнкү кабатына орнотулган. 33 жаштагы аял 25 метрлик бийиктиктен секирип, жердеги бетон конструкцияга урунган. Ал өтө оор абалда ооруканага жеткирилген.
"Бейтаптын баш сөөгүнө операция жасалып, гематома алынган. Бирок дарылоодон майнап чыкпай, аял каза тапты", — деп айтылат маалыматта.
Кырсыкка тростун имараттын бийиктигинен узун болуп калганы себеп болгон. Анын кесепетинен аял жакын адамы менен досторунун көз алдында жерге кулаган.
Аял аттракциондон секирер алдында ага "мен сени сүйөм" деп кыйкырган жигиттин үнүн видеодон угууга болот.
Факт боюнча кылмыш иши козголду. Аттракциондун ээси менен жумушчулары көрсөтмө берип жатышат. Тергөө трос эмне себептен имараттын бийиктигинен узун болуп калганын аныктоодо.