Ысык-Көл облусунда беш туристтик тейлөө борбору ачылат. Мындай маалыматты Самат Шатманов Sputnik Кыргызстан радиосунун эфиринде маек куруп жатып билдирди.
Анын айтымында, борбордун аянты 150 чарчы метрди түзүп, туризм объектилери тууралуу маалымат алуу, тамактануучу, эс алуучу жайлары жана ири унаа токтотуучу жерлери камтылган.
"Ысык-Көл облусунун айланасында беш туристтик тейлөө борбору ачылат. Борборлорду куруу боюнча тендер өткөрүлүп, ишти аткара турган компания да аныкталды. Анын аянты 150 чарчы метрди түзүп, туризм объектилери тууралуу маалымат алуу, тамактануучу, эс алуучу жайлары жана ири унаа токтотуучу жерлери бар. Каалаган эс алуучу келип, тиешелүү жардамын алса болот. Эгерде быйыл курулуш башталып калса, кийинки жылы күз айларында имараттар ишке берилип, туристтерди тейлөөгө даяр болуп калат", — деди Шатманов.
Ошондой эле жетекчи республиканын башка облустарында да туристтик борборлорду ачуу пландалып жаткандыгын кошумчалады.