БИШКЕК, 7-окт. — Sputnik. Москванын Шереметьево аэропортунда Кыргызстандын 100гө чукул жараны кармалып туруп, Бишкек убактысы менен саат 13.00гө чейин баары өткөрүлдү. Бул тууралуу Кыргызстандын Россиядагы элчилиги билдирип, кырдаалга түшүндүрмө берди.
Дипломатиялык өкүлчүлүктүн үч кызматкери аталган аба майданга барып, мекендештерге жардам берген.
"Жарандар ФСБнын Чек ара кызматы тарабынан текшерүү иштеринен улам кармалып турушту. Мындай абал Россияга кирүү уруксатынан ажыраган кыргызстандыктардын жеке маалыматтарын өзгөртүп жаткандыгына байланыштуу. Чек ара кызматы өлкөгө киргендердин Россияда тыюу салынган уюмдарга тиешесинин бар-жогун аныктоодо", — деп түшүндүрдү элчилик.
Аэропортто суткалап кармалып турган кыргызстандыктарды тамак-аш менен камсыздоо өтүнүчү келтирилген.
Бишкек убактысы менен саат 10.00дөн 13.00гө чейин кыргызстандыктардын баары өткөрүлүп, бир жаран боюнча кошумча териштирүү зарылдыгы жаралганы белгилүү болду.
Элчиликтин кызматкерлери азыр аба майданда.