БИШКЕК, 5-окт. — Sputnik. Милдеттүү медициналык камсыздандыруу фонду (ММКФ) онкологиялык илдети бар жарандар мамлекеттик кепилдик программасынын алкагында морфин препаратын алууга укуктуу экенин эске салды.
"Бейтаптар илдеттин терминалдык стадиясында ооруну басаңдата турган препараттарды, анын ичинде морфинди инъекция жана таблетка түрүндө алса болот. Эгер оорулуу каттоодо турган Үй-бүлөлүк медицина борборунда (Үй-бүлөлүк дарыгерлер борбору) отчёттук учурда акча каражаты болуп калса, препарат эки ирет берилиши мүмкүн", — деп айтылат билдирүүдө.
Ооруну басаңдатуучу дары-дармектерди алуу үчүн тургун жашаган жериндеги Үй-бүлөлүк медицина борборунан кошумча маалымкат жана бейтаптын ким экенин тастыктаган документ зарыл. Препараттар акысыз берилет.
Ошондой эле фонддон паллиативдик жардамга муктаждар үчүн Telegram-чат ачылганын билдирди.