БИШКЕК, 30-сен. — Sputnik. Мамлекет башчы Садыр Жапаров мурда үй-бүлөсү менен жашаган эки кабаттуу үйүн кайтарымсыз негизде Мамлекеттик ипотекалык компаниянын балансына өткөрүп берди. Бул тууралуу президенттин маалымат кызматы кабарлады.
Билдирмеге караганда, Жапаров турак жайынын документтерин Мамлекеттик ипотекалык компания башкармалыгынын төрайымы Аида Төлөгөновага өзү тапшырып, үйүн көрсөткөн.
Президент бул үйдү 2005-жылы эле сатып алышканын айтып, 2010-жылы башка жакка көчүп кеткендиктен турак жай ошол убактан бери бала бакча катары иштеп келгенин белгилеген.
Мамлекет башчы үйүн өлкөдө жеке турак жай рыногун жакшыртуу, компаниянын "Менин үйүм — 2021-2026" мамлекеттик программасынын алкагында муктаждарды турак жай менен камсыздоосуна жардам берүү максатында бергенин белгилеген.
"Муну менен биз колунда бар, мүмкүнчүлүгү жетиштүү кыргызстандыктарды чындап муктаж болгондорго жардам берүүгө чакыргыбыз келди. Көп адамдар үй сатып алуу үчүн чет өлкөгө иштегени кетип жатканы баарына маалым. Ошондуктан шарттарды жеңилдетип, бардык жарандар үчүн иштеген ишине карабастан жеткиликтүү кылуу максатында ипотекалык насыя берүү программасын өзгөртүү чечими кабыл алынды", — деген Жапаров.
Президент Мамлекеттик ипотекалык компания бул үйдү аукционго койсо, андан түшкөн акчага жеңилдетилген ипотекалык насыялоо программасынын алкагында 10 үй-бүлөнү батир менен камсыз кылууга мүмкүн болорун айткан.
Өз кезегинде Аида Төлөгөнова ипотекалык программага көрсөткөн колдоосу үчүн Жапаровдун үй-бүлөсүнө ыраазылык билдирген.
Белгилей кетсек, "Менин үйүм - 2021-2026" мамлекеттик турак жай программасы 2021-жылдын 16-сентябрында ишке кирген. Жаңы турак жай программасына катышкан жарандар төмөнкү багыттар боюнча ипотекага ээ боло алышат:
- Жеңилдетилген ипотека – 4 пайыз (мамлекеттик жана бюджеттик чөйрөнүн кызматкерлерине);
- Жеткиликтүү ипотека - 8 пайыз (жарандардын башка категориялары үчүн).