БИШКЕК, 30-сен. — Sputnik. Жалал-Абаддын Сузак районунда төрт киши күйдүргү (Сибирь жарасы) илдетине кабылганы аныкталды. Бул тууралуу Жалал-Абад райондор аралык санитардык-эпидемиологиялык көзөмөл жана жугуштуу оорулардын алдын алуу борборунун жетекчиси Рома Ураимов билдирди.
Октябрь айылындагы ооруканага бардыгы болуп сегиз киши кайрылган. Алардын төртөөсү оору жуктурганы аныкталган. Абалдары канааттандырарлык деп сыпатталууда. Калган төртөө дарыгерлердин көзөмөлүндө.
Буга чейин Аксы районунда жети киши күйдүргү илдетин жуктурганга шектелип ооруканага түшкөн. Анын экөөсүндө инфекция аныкталган. Дагы 41 киши дарыгерлердин көзөмөлүндө.
Күйдүргү — айыл чарба жана жапайы жаныбарларда, ошондой эле адамдарда кездешүүчү өзгөчө коркунучтуу жугуштуу оору. Анын бактериялары топуракта узак мезгилге сакталат.