БИШКЕК, 28-сен. — Sputnik. Өзбекстандын президенти Шавкат Мирзиёев Наманганда шайлоочулар менен жолугушуу учурунда Афганистандын чек арасындагы атышуудан өзбек чек арачысы көз жумганын билдирди. Бул тууралуу "Нигох" Telegram каналы жазган.
Билдирмеге караганда, 26-сентябрда афганистандык баңгитөбөл Өзбекстандын чек арасынан мыйзамсыз өтүүгө аракет кылган учурда атышуу болгон.
"Аймактын бүтүндүгү боюнча маселе жаралганда биздин позициябыз бекем. Эгер зарылчылык жаралса, чек араны курал менен коргойбуз. Аскерлерибиздин бири милдетин аткарам деп каза болду. Ал ушул жердин — Намангандын уулу болчу", — деди Мирзиёев.
Жакында эле Индиянын бийлиги Афганистанга тиешелүү 2,7 милииард долларга бааланган үч тонна героин кармалганын маалымдаган. "Талибан"* кыймылы Афганистанды баңгизат колдонулбаган мамлекетке айлантарын убадалаган.