БИШКЕК, 26-сен. — Sputnik. Кыргызстандын эгемендүүлүгүнүн 30 жылдыгына жана тунгуч жазма акын, агартуучу, манасчы Тоголок Молдонун 160 жылдыгына арналган Дүйнө элдеринин эпосторунун VI эл аралык фестивалы ийгиликтүү жыйынтыкталды. Бул туурасында Маданият, маалымат, спорт жана жаштар саясаты министрлиги билдирди.
Аталган фестиваль Кыргызстан, Казакстан, Өзбекстан, Россия (Хакасия, Тоолуу Алтай, Тыва, Калмыкия, Саха- Якутия, Башкыртстан, Новосибирск, Абхазия ж.б.), Азербайжан, Армения, Беларусь, Эстония, АКШ, Иран, Франциянын илимпоз жана өнөр адамдарынын башын бириктирди.
"Үч күнгө созулган иш-чара илимий-практикалык симпозиум, тегерек стол жана маданий ар түрдүүлүк парады менен коштолуп, эл аралык маданий алака бекемделди", — деп айтылат маалыматта.
Салтанаттуу жабылыш аземге мамлекеттик катчы Чолпонбек Абыкеев, маданият, маалымат, спорт жана жаштар саясаты министри Кайрат Иманалиев катышып, фестивалдын маани-маңызы жана ролу тууралуу кайрылуу жасашты.
Аны менен катар "Манас" улуттук театрынын ачылышы тууралуу расмий жарыяланып, анын директору Азиз Биймырза уулу тааныштырылды.
Ошондой эле концерттик программа чет өлкөдөн келген олонхо, кайчы, жангар жана дастан айтуучулардын катышуусу менен уланып, Кыргызстандын өнөр адамдары катышкан концерттик программа менен коштолду.
Мейман катары Кыргызстандагы бир катар элчиликтер, дипломатиялык корпустардын өкүлдөрү, коомдук-маданий ишмерлер катышты.