БИШКЕК, 17-сен. — Sputnik. Бүгүн, 17-сентябрда, ИИМдин кызматкерлери мурдагы президент Алмазбек Атамбаевге дагы бир кылмышка шектүү катары кабарлама тапшырган. Бул тууралуу Sputnik Кыргызстанга анын адвокаты Сергей Слесарев билдирди.
Жактоочунун айтымында, Атамбаевге 2016-жылы Түркияда туулган ондогон адамдарга Кыргызстандын паспортун мыйзамсыз берүү боюнча ачылган кылмыш ишинин алкагында айып тагылууда. Бул кылмышка президенттик аппараттын экс-жетекчиси Фарид Ниязов, мурдагы вице-премьер Тайырбек Сарпашев жана жарандык берүү боюнча комиссиянын бир нече кызмат адамдары шектелүүдө.
Буга чейин милиция 2016-жылы Фарид Ниязов төрагалык кылган Жарандык маселелер боюнча комиссия түркиялыктарга мыйзамсыз жарандык берүүнү чечип, ага ошол кездеги президент Алмазбек Атамбев кол койгонун билдирген. Бул боюнча Жазык кодексинин "Коррупция" беренеси менен козголгон кылмыш иши тергелүүдө.
Андан кийин түркиялыктарга мыйзамсыз кыргыз жарандыгын берип жүргөн деген айып менен Мамлекеттик каттоо кызматынын алдындагы Калкты жана жарандык абалдын актыларын каттоо департаментинин мурдагы жетекчиси С.Д. кармалган.
Эске салсак, учурда кыргыз коомчулугунун ар кыл реакциясын жаратып, тарапташтары митингге чыгып жаткан окуянын себепкери "Сапат" лицейлеринин жетекчиси Орхан Инанды да жарандыкты мурдагы президенттин бийлиги учурунда алган. Тагыраагы, 2012-жылдын 4-декабрында ошол кездеги президент Алмазбек Атамбаевдин жарлыгы менен Кыргызстандын жарандыгы берилгени кабарланган.