Быйыл окуу жылы 15-сентябрдан башталгандыгына байланыштуу күзгү, кышкы жана жайкы каникулдар да эки жума артка жылат. Бул тууралуу Чынара Исакова Sputnik Кыргызстан радиосуна маек куруп жатып билдирди.
Анын айтымында, мындай иш графиги менен акыркы коңгуроо салтка айлангандай 25-майда эмес, июнда өтүп калат.
"Пандемия учурунда 1,5 жыл балдар онлайн окууга мажбур болушту. Быйыл реалдуу режимде окууга өтүп, окуучулар кубанып турушат. Бирок жылдагыдан айырмаланып окуу жылы 15-сентябрдан, тагыраак айтканда, эки жумага кеч башталды. Демек, белгиленген каникулдар, анын ичинде жайкы каникул дагы эки жумага артка жылат. Анткени биз мектеп программасын толук окуп бүтүшүбүз керек", — деди Исакова.
Педагог мындай эрежеге өтүү үчүн бир топ иштер аткарылышы керектигин кошумчалады.