БИШКЕК, 12-сен. — Sputnik. Кыргызгидромет агенттиги келе жаткан жумага карата аба ырайынын божомолу тууралуу маалымат берди.
Ага ылайык, келе жаткан жумада аба ырайы бир калыпта болбойт. Айрым күндөрү кээ бир райондордо өткүн өтүп, жаан жаашы ыктымал.
Бишкек шаары менен Талас облусунда 12-сентябрдан 18-сентябрга чейин жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетиши ыктымал.
Ош, Жалал-Абад, Баткен, Чүй облустарында 12-сентябрь жана 16-сентябрда күндүз күн себелеп, тоолуу аймактарга жаан жаашы мүмкүн. Башка күндөрү жаан-чачын күтүлбөйт, күн ачык болот.
Ысык-Көлдө 15-сентябрга чейин жаан жаабайт. 15-16-сентябрда күндүн көзү бузулуп, кээ бир жерлерде өткүн өтүп, күн күркүрөшү божомолдонду. 17-18-сентябрь аба ырайы жылуу болуп, күн кайра ачылат.
Нарында 16-сентябрда гана күн күркүрөп, жаан жаашы ыктымал. Калган күндөрү аба ырайы жылуу, күн ачык болору кошумчаланды.