БИШКЕК, 9-сен. — Sputnik. АКШнын экс-президенти Дональд Трамп UFC уюмунун экс-чемпиону Витор Белфорт менен бокс легендасы Эвандер Холифилддин беттешине комментаторлук кылат. Бул тууралуу Р-Спорт маалымат булагы жазды.
UFC уюмунун орто оор салмактагы экс-чемпиону 44 жаштагы Белфорт менен кесипкөй бокс боюнча эки дивизиондун чемпиону 58 жаштагы Холифилддин беттеши 12-сентябрда Флоридада өтөт. Кармаш бокс эрежеси боюнча болору айтылды.
"Дональд Трамп Sky News маалымат булагына берген комментарийинде ишемби күндөгү беттешти чыдамсыздык менен күтүп жатканын билдирген", — деп айтылат маалыматта.
Холифилд буга чейин Майк Тайсон менен беттешүүнү макулдашкан болчу. Бирок ал беттеш Тайсондун айынан болбой калган.