БИШКЕК, 7-сен. — Sputnik. UFC уюмунун кыз-келиндер дивизионунун жеңил салмактагы чемпиону, кыргызстандык мушкер Валентина Шевченко титулун коргоо үчүн кезектеги беттешине даярданып жатат.
Анын атаандашы учурда удаасы менен беш жеңишти камсыздап келген 37 жаштагы америкалык Лорен Мерфи болмокчу. Беттеш 25-сентябрга белгиленген.
Шевченко эркектер арасында эң жеңил салмактын чемпиону, мексикалык Брэндон Морено менен чогуу машыгууда. Мушкер кыз чемпион менен чогуу машыккан сүрөттөрүн Instagram баракчасына жарыялады. Анда кыргызстандык атлеттин командасы менен кошо Морено да турат.
Мексикалык мушкердин келерки беттеши декабрга белгиленген.
33 жаштагы Шевченко акыркы кармашында эң жеңил салмактын экс-чемпиону, бразилиялык Жессика Андрадени утуп, UFC уюмунун чемпиону наамын бешинчи ирет коргогон.