БИШКЕК, 30-авг. — Sputnik. Бүгүн, 30-августта, өлкөнүн Куралдуу күчтөрүнүн Улуттук гвардиясынын аскер кызматчысы, прапорщик Кайратбек Рапиев ультрамарафонго Суусамыр өрөөнүнөн старт берди. Бул тууралуу Коргоо министрлиги билдирди.
Жалпы узундугу 150 чакырымды түзгөн маршурт 31-августта Бишкектин борбордук "Ала-Тоо" аянтында аяктайт.
"Кайратбек Рапиев жакшы даярдык менен марафондо ийгилик жаратарына ишенет. Ал бул эмгегин Кыргызстандын эгемендүүлүгүнүн 30 жылдыгына арнайт. Аны Улуттук гвардиянын видео тарткан тобу жана медицина кызматкерлери коштоп жүрөт", — деп айтылат билдирүүдө.
Рапиев 2019-жылдын июнь айында Ысык-Көлдү айланып 374 чакырымды басып өткөн.