БИШКЕК, 29-авг. — Sputnik. 2020-жылы тамактануу жайларынын жүгүртүүсүнүн көлөмү 2019-жылга салыштырмалуу 39 пайызга төмөндөп, кафе-ресторандар 15 миллиардга жакын сомдон кол жууду. Бул тууралуу Улуттук статистика комитети билдирди.
Мындай төмөндөө коронавирус инфекциясынын жайылышына байланышкан чектөө чараларынан улам болгону жалпыга белгилүү. Аны менен катар тамак-аш менен камсыздоо боюнча чарбалык субъекттердин саны 2019-жылы 4 547 болсо, 2020-жылы 4 446сы гана калган. Демек, 100дөй мекеме ишин токтоткон.
Көбүрөөк Ысык-Көл (68 пайыз), Талас (48 пайыз) облустарында жана Бишкек шаарында (42 пайыз) жайгашкан тамактануу жайлары жабыркаган.
Эске салсак, 2020-жылдын жаз айларында коронавирус пандемиясынан улам карантиндик чектөөлөр киргизилип, көптөгөн ишканалар убактылуу ишин токтотуп же чектөөлөр менен иштөөгө аргасыз болгон.