Эгемендүүлүктү алгандагы мамлекетти башкарууда кетирген эң чоң каталардын бири бул партиялык мектептен баш тартуубуз болду. Мындай пикирин Самат Ашымов Sputnik Кыргызстан радиосуна маек куруп жатып билдирди.
Анын айтымында, тескерисинче, партиялык мектептин системасын колдонуу менен кадрдык саясатты жүргүзүү керек эле.
"Советтер Союзунда партиялык мектеп күчтүү эле. Мына ушул жолго салынып калган системадан баш тартпай, Кыргызстан эгемендүүлүктү алганда өзүнө ылайыкташтырып улантып кетсе болмок. Мамлекеттүүлүгүбүздү жар салгандан кийинки эң чоң ката ушул болду. Партиялык мектептен баш тартуу менен мамлекеттик башкаруу кызматтарына тууган-урук, тааныш-билиш аркылуу келгендер көбөйдү. Бул өз кезегинде иштин сапатын төмөндөтүп, өлкөнүн экономикасына эле эмес, бардык тармактарга терс таасирин тийгизди. Тилекке каршы, ушул күнгө чейин эле мындан арыла албай келебиз", — деди Ашымов.
Эксперт эгемендүүлүк жаңы колго тийген жылдары илимий чөйрөдөгү адамдарды башкаруу системасына аралаштыруу тажрыйбасы да катачылык болгонун кошумчалады.