БИШКЕК, 27-авг. — Sputnik. Лейлек районундагы Максат айылында 84 үй-бүлөгө жаңы турак жай берилди. Бул тууралуу мамлекет башчынын маалымат кызматынан билдирди.
Бүгүн Баткен облусуна барган президент Садыр Жапаров кыргыз-тажик чек арасындагы окуядан жабыркагандар үчүн Максат айылында курулган үйлөрдү кыдырып көрдү.
Өлкө башчы жергиликтүү тургундар менен жолугушуу учурунда аларды келе жаткан эгемендүүлүк күнү менен куттуктады.
Президенттин айтымында, Мекендин көз карандысыздыгы — тынчтык жана өлкөнүн бүтүндүүлүгү.
“Баткендеги чек ара жаңжалы учурунда элибиз биримдиктүү экенин дагы бир ирет далилдеди. Биргеликте тоскоолдуктарга туруштук бердик. Каргашалуу окуялар учурунда 36 жараныбыз каза таап, жүздөгөн киши жаракат алды. Алардын жакындарына терең кайгыруу менен көңүл айтам, ар биринин үй-бүлөсүнө колдоо көрсөтүүгө аракет кылуудабыз. Талкаланган үйлөрдүн ордуна жаңы, бардык шарттары бар тамдар курулууда. Ошону менен бирге социалдык көйгөйлөрдү чечүүгө аракет кылып жатабыз”, — деди президент.
Жапаров Баткен районунун аймагында калган 40тай үй сентябрь айынын соңуна чейин бүтөрүн кошумчалады. Ошондой эле ал жаңы үйлөргө эмерек сатып алуу боюнча дагы жардам берилерин айтты.
Эске салсак, быйылкы жылдын 28-30-апрелинде кыргыз-тажик чек арасындагы кагылышуудан улам 36 кыргызстандык каза болуп, 100дөн ашык адам жаракат алган. 136 үй урандыга айланып, 15 социалдык объект жана ондогон бизнес объектилери талкаланган.