БИШКЕК, 26-авг. — Sputnik. Бишкектеги Төмөнкү Төкөлдөш конушунун жашоочулары Кыргызстандын президентине кайрылуу жолдошту.
Алар конуштун Курманжан датка, Кийизбаева, Төрөкул Айтматов жана Артемов көчөлөрүндөгү турак жайларды мыйзамдаштыруу маселесин өз көзөмөлүнө алууну өтүнүшүүдө.
Кээ бирлеринин техникалык паспорту дагы жок. Себеби алар үйлөрүн 1990-жылдары, мамлекеттик каттоо жок учурунда алып калышкан. Бүгүнкү күндө алар үй-бүлө мүчөлөрүн жашаган жери боюнча каттата албай жатышат. Паспортторунун дагы мөөнөтү бүтүп баратат. Жаңысын алса үй ээлери өздөрү дагы каттоого тура албай калышат.
"Каттоо жок болсо көп көйгөй жаралат. Кредит, балдарга жөлөк пул ала албайбыз. Ошондой эле мектепке, бала бакчага барууда маселе жаратат. Шайлоого катышуу укугунан дагы ажыраганбыз", — дешти жашоочулар.
Шаардыктардын айтымында, бул көйгөйлөрдү жоюу шаардык кеңештин № 339 токтомунда каралган. Документте 1999-жылга чейин салынган үйлөрдү мыйзамдаштырууга жол берилген. Жарандар мүмкүнчүлүктөн пайдаланып калууну пландап жүрүшкөн, бирок 2006-жылы кабыл алынып 2025-жылга чейин иштей турган башкы план буга жолтоо болгон.
"Бишкек башкы архитектура" башкы планды эске алып аталган аймактын чегин аныктап берүүдөн баш тартты, бирок альтернативдүү варианттарды сунуштаган жок", — деп айтылат кайрылууда.
Кайрылууда Свердлов райондук администрациясы менен мэрия үйлөрдү Жарандык кодекске таянып соттук процесс менен мыйзамдаштырууну сунуштаганы айтылат. Бирок аймактын жашоочулары баш тартып коюшкан, себеби сот жерди мыйзамдаштырып берерине кепилдик жок, ал эми мүмкүнчүлүк ошону менен жок болушу мүмкүн.
Жашоочулар башкы планга карабай эле чекти аныктоо процедурасын жүргүзүп маселени чечсе болорун айтып жатышат. Алар жерди мыйзамдаштыруу жана мыйзам боюнча майда көйгөйлөрдү жоюу боюнча комиссия түзүүнү сунушташты.