ОШ, 23-авг. – Sputnik. Бүгүн, 23-август күнү, Ош шаарынын мэринин милдетин аткаруучу Алмаз Мамбетов маалымат жыйын өткөрүп, журналисттердин суроолоруна жооп берди. Өз сөзүндө ал аталган кызматка шайланып калса, кандай жумуштарды аткарарына токтолду.
Мамбетов 21-кылымда Ош шаарында суу жок деген түшүнүк болбошу керек деген пикирде.
"Аэропорттон түшөрүм менен эле калаада суу боюнча көйгөй бар экенин көрдүм. Калаа жашоочуларын үзгүлтүксүз таза суу менен камсыз кылуу үчүн иш үч багыт боюнча каралып жатат. Борбор калаадан атайын адистер чакырылды. Алар менен маселени чечүүнүн жолдору талкууланууда. Мисал катары айтсам, Израиль мамлекетинде 600 чакырым аралыктан түтүк аркылуу суу тартылган. Ошто суу маселеси жолго коюлгандан кийин ага төлөнүүчү бааны карап чыгуу керек", — деди ал.
Ал эми калаа ичинде көп кабаттуу үйлөргө жакын курулуп, иштеп жаткан май куюучу жайлардын ээсине жер берүү аркылуу шаардын четине көчүрүп, маселени чечүүгө боло тургандыгын айтып өттү.
Мамбетов калаа бюджетин дагы 500 миллион сомго көбөйтүүгө болорун айтып, бул боюнча тиешелүү жетекчилерге тапшырма коюлгандыгына токтолду. Анын пикиринде, учурда ишкерлердин 30-40 пайызы кирешесин жашырып салык төлөбөй келет.
Мэрдин милдетин аткаруучу жыл аягына чейин бул багыттагы иштерди бүтүрүүнү мэриянын тышкы байланыштар жана аналитика бөлүмүнө, Салык кызматына тапшырган.
Ал эми Мамбетовдун борбордук аянтка фонтан куруу демилгесине калаа тургундары нааразычылык билдирип, башка социалдык көйгөйлөр чечиле электе бул сунуш орунсуз деп сынга кабылган.
"Ар бир шаардын борбору болот. Ошол борбордо канчалаган расмий иш-чаралар өткөрүлөт. Ошондуктан калаанын борбору көрктүү жана анын статусуна төп келиши керек. Ошол максатта борбордук аянтка фонтан курууну туура деп эсептейм. Демилге демөөрчүлөрдүн эсебинен ишке ашырылат", — деп жооп берди.
Мамбетов Ак-Бууранын жээгин көрктөндүрүү жана жашылдандыруу долбоорун улантып, аягына чыгаруу ниети бар экенин билдирди.
Бул курулуш долбоору 252 миллион сомго бааланган. Учурда жарым акчасы шаардын казынасынан бөлүнүп, иш жүрүүдө. Мамбетов долбоордун жалпы шаарга жана шаардыктарга кереги тиерин белгилеп, ишти жарым-жартылай токтотуп коюу туура эмес экенин айтты.
Мамбетов, мындан сырткары, алдыдагы Жогорку Кеңешке депутаттарды шайлоодо административдик ресурс колдонулбай тургандыгына убада берди. Ошондой эле айрым жетекчилер сыяктуу "кылмыш дүйнөсү" менен тыгыз байланыштагы спортчулардан турган колдоочулары жок экендигин, андай аброю булганган, тажрыйбасы жок жарандарды кызматка албай тургандыгын убадалады.