БИШКЕК, 18-авг. — Sputnik. "Талибан"* кыймылы маалымат жыйынын өткөрдү. Анда айтылгандарды РИА Новости менен анын Telegram каналы жазды.
Урунттуу учурлардан кыскача:
- Афганистандын бардык чек араларын көзөмөлдөп турушканын жар салышты;
- Афганистанга курал-жарактарды аткезчилик менен алып келүүгө жол бербөө жана буга чейин өлкөдөгү куралдарды каттоону пландап жатышат;
- баңгизаттын бир дагы түрүн чыгарышпайт, бирок буга эл аралык жардам керек;
- алар эсептешип отурууну каалашпайт, ошондуктан кыймылга каршы болгондордун баарына кечирим берүү актын чыгарышты;
- Афганистандагы бардык өлкөлөрдүн жана эл аралык уюмдардын дипломатиялык өкүлчүлүктөрүнүн аймактары толугу менен коопсуздукта болот;
- бардык афган жарандарынын диний ишенимдерин жана руханий баалуулуктарын урматтоого убада беришти;
- жалпы жарандарга, ал тургай АКШ менен кызматташкандар да коопсуздукта болот деп сөз берип, өлкөдө эле калууга үндөштү;
- аялдардын коомдогу ролун баалай турганын, алар өлкөнү өнүктүрүүгө жардам берерине ишенерин билдиришти;
- ислам эмирлиги өлкөдөгү аялдарга шарият жана мыйзам тарабынан каралган бардык укуктарды берүүгө милдеттенме алат;
- жаңы өкмөткө коомдун бардык катмарын кошууну көздөп жатышат.
Афганистандагы кырдаал
Бир нече апта мурда Америка өз аскерлерин чыгарып кеткен соң Афганистанда абал кескин курчуган. Талибдер бир катар ири шаарларга кол салып, басып алышкан. Жекшембиде согушкерлер өлкөнүн бардык чек ара өткөрүү жайларын көзөмөлгө алып, президенттик сарайга киргенин жар салган.
Афганистандын президенти Ашраф Гани өлкөдөн чыгып кетип, учурда анын каякта экени дайынсыз болууда. Дүйшөмбүгө караган түнү "Талибандын"* өкүлү Мухаммед Наим 20 жылга созулган согуш аяктаганын, жакында мамлекетте жаңы башкаруу формасы киргизилерин билдирди.
Ал арада Панджшер аймагы талибдерге каршылык көрсөткөнү айтылып, вице-президент Амрулла Салех өлкөнүн убактылуу президенти экенин билдиргени айтылды.
"Талибан"* — Кыргызстанда жана башка мамлекеттерде диний-экстремисттик уюм катары тыюу салынган кыймыл болуп саналат.