БИШКЕК, 18-авг. — Sputnik. Алматыга Афганистандан эвакуацияланган 42 киши учак менен алып келинди. Бул тууралуу Казакстандын Коргонуу министрлигинин маалымат кызматы билдирди.
Учак саат 17:00дө конгон. Бортто 25 казакстандык (арасында 10 бала бар) жаран жана Казакстандын Кабулдагы элчилигинин кызматкерлери болгон. Мындан сырткары, кыргыз тараптын өтүнүчү менен 14 кыргызстандыкты ала келишкен.
Буга чейин Кыргызстандын ТИМи менен Афганистандагы элчиси Мирослав Ниязов 15 жаран эвакуацияланганын кабарлаган. Ниязов кыргызстандыктар так ушул рейс менен кеткенин белгилөөдө.
17-августта Афганистандан тогуз кыргызстандык мекенине кайтарылган. Элчи Ниязов Афганистанда жалпы жонунан 20 кыргызстандык бар экенин айтып, алардын бардыгы кызмат көрсөтүү тармагында иштеп келгенин билдирген.
Афганистандагы кырдаал
Афганистандын президенти Ашраф Гани өлкөдөн чыгып кетип, учурда анын каякта экени дайынсыз болууда. Дүйшөмбүгө караган түнү "Талибандын"* өкүлү Мухаммед Наим 20 жылга созулган согуш аяктаганын, жакында мамлекетте жаңы башкаруу формасы киргизилерин билдирди.
Ал арада Панджшер аймагы талибдерге каршылык көрсөткөнү айтылып, вице-президент Амрулла Салех өлкөнүн убактылуу президенти экенин билдиргени айтылды.
"Талибан"* — Кыргызстанда жана башка мамлекеттерде диний-экстремисттик уюм катары тыюу салынган кыймыл болуп саналат.